30‏/09‏/2008

صور جميلة

29‏/09‏/2008

شو

شو حلوه لمّا بتبكي
وراسك عا كتفي مطعوج
زي طفل عمّا يشكي
ويتزعوَلْ عامل غنوج
*************
شو ما عملنا من جـْميل
ما بـيعــجبهـــم العجب
لو صـُمنا الشـّهر الفضيل
وسـَبـَّقـْنــالــو مع رجب
****************
شو هــالنّـــاس الغريــبه
مالـــو يـــملا لخـَزّان
شايف من رَبـّو زبــيبــــه
ومفكــِّر غيـــرو ذُبــــّان
***************
شـو هالحكي عـِنــّا بلت
وبدنا نـِشـرح بالتـّفصيل
عن صـبايا الأنــتــرنت
ما عــدنا نـْدَبــِّر هالجـّيل
**************
شــو مع حـُكم الســّلاطين
تـْـــغـَيــَّرت عنّا الاِحـــوال
صارت ســُلــْطـِة نســاوين
ويَ حـْويني على الرِّجــال
***************
شو بنت لابسه ديباج
وشايفه حالا ست الكل
ألله يخلّي هالمكياج
عَ الطّبيعه بقــُلاّ وَلْ
**************

يا ريت

يا ريتني شفتــك عند لشروق
وْصـُبلـِّك القهوه من الدلــِّـه
وسـلـِّم عليكي عاطريق الـسـّوق
وشيل عـنــِّك حـِمـِل هالسـَّلـِّه
***************
يا ريت مَ صـَدِّق القالو بــِكــِتْ
وضـَيَّــعَتْ الكتب والكراريس
وتا أدفع عنها سعر التــِّكــِت
سـاعة ســفر في الأوتوبيــس
*****************
يا ريت تــِدْري وأنا أدري
وحبـِّك ياخذ بقلبي مطرحـا
وأحفر إسمك جوّات صدري
شوتبقي بفؤادي ورده مفرفحا

هوّارة وصيّة العروس

هوارة وصيّة العروس
هواره لست البنات ** للعروسه اذكروهـــا
تعمل كل الواجبات ** المنزليّه اعطوهــــا
من المتطــفـــلا ت ** لا تكــوني نبهوهـــا
يكون عندك الصفات ** حلوه بحاره يرووها
مش اتنقّي بقولك هات** حياتكو أعـرفوهــــا
بعيلتكم إستشارات ** بجيزه حلوه حبوها
زمن الخطوبه فــــات ** لازمكو تفهــمــوها
الجيزه فيها صعوبات ** بعقلانيه احملوهـــا
ما بدّي هاي النغمــــات** زعلانه بدار أبوهـا
سامعه شويّة مقلتات** ودعايه بهووهـــــــا
عندو كمّن بصبصات ** ع صبايا شرفوهــــا
وحامل علم الغزوات ** بدّي إترجعوهـــــــــا
شويه شويه خذ وهـات ** ألطوشه وقفوهـــــــا
إللقمه بدها جبهــــات ** هالكلمه أدركوهـــــا
لمّن تسهروا السهرات** أيام الخطبه أذكروها
تانقول ياللي فات مات** ويبعد شر الأشراره

26‏/09‏/2008

التسامح

إبدأ باسم الرحمن الرّحيمي
ومشي عَ الصراط المـــستقــيمي
باري الكون والدّنيا بخلايق
وبالخلْق ربــي أكبـــــر حكـــيمي
إحكي كلامك وِيكون لايق
وامشي دوم ع الدرب القويــــــمي
وان كنت على الطروقات سايق
لا تعمل غلطه عواقبها وخيمـــي
وان كنت من الأحزان ذايق
الصبر يكون من ربّك حلـــــيمي
بقلّك هالزجل فيّو حقايق
التسامح فيّو كنز وغنيمــــــي
تعوا نتصافح وننسى البضايق
نرمي شر الشيطان الرجـيمي
إبليس صانع لكل العوايــــق
فتنه وقتل جاهات وعزيـــمـــي
بطلب من شعبنا يضل فايـــــق
عا أفعــــال غضّـــاره ولئــيمـــي
خِلافك بين الاِخوه والشقايــق
مسخره ومهزله ملهـــاش قيمــي
جهلك بالأمور كثير عايق
والمشاكــل بَعِــدّا مُـــصيــــبي
ورطه فيها عا فعل الجريمي

24‏/09‏/2008

يافة النّاصره(قريتي)

يافــتــنا مكللها ورود*** موقعها عا مرجتنا
وبضبّط دوزان العود***عا ألحان محبّتــــنا
ــــــــــــــــــــــــــــــــ
حمامه بأرضك جليلي*** مع زغاليلا تلـــتم
ولمّا تكون مقابيلــــي*** تنقْوِد قمحاتا بالفم
صارت تعرف سبيلي***وبأوقاتي شو تهتم
محلا صوتا هديلــي***وإلها كل مــودّتــــنا
ــــــــــــــــــــــــــــــ
والشمس بنورا جايي *** وتلامسني بِِرِقّــــــــــّا
جايي عا أحلى بنايه *** وتدخل عا أشلب شقّه
وقفت حلوي ع مرايه *** ونسيج شعاعا دقـــــّا
غطست خجلانه كفايه*** بعد ما لاطفــــــــــتنا
ـــــــــــــــــــــــــــــ
بتنظر لورود الريحـان *** بعرض الشّارع وبطولو
وبنت حلوه غصين البان *** برقبتها عقد اللـولـــــو
والورود الفيها الــــوان ***عمّا يغنـــّوا ويقولـــــو
محلا القعده يا إنســــان*** وجيره حلوه بيا فتنـــا

23‏/09‏/2008

أم العيون(موشح)

من نظراتك علينا*** شو بالي ارتـــــاح
خليتي لعينينــــــا *** تهز بلا اقـــــــداح
ــــــــــــــــــــــــــــ
نظراتك نــظرة مـــوضى ***يا اجمل أنســــــــان
بحبك من يوم الروضــــه ***وصف البســــــــتان
حياتي ما هي فوضــــــى *** وكلاّ ميـــــــــزان
وعنظارك هالمعروضـه *** أنــــــــــــــا مرتـــاح
ـــــــــــــــــــــــــــ
خليتي لعينينــــــــــــــــــا *** بلا اقداح تــــــــهـــــز
وبسهـــــــــامك رميتينــا *** وصارت تغـــــــــــــز
روحك علّقتي فينـــــــــــا *** وعا قــلبي تلــــــــــز
وخدودك ذوّقـــتــينا *** حَــــــبّ التـــــــــــفــّاح
ـــــــــــــــــــــــــ
عيونك تفرض سيــــادي *** يا ام العيــــــــــــــــون
زي ريّس قيــــــــــــــادي ***عا كل الكـــــــــــــون
عم تعـــطيني سعــادي *** وانـــــــــا مفــــتـون
همًٌٌٌَُّ زيِّ الصيـــــــــــّــادي ***بس بلا ســــــــــــلاح

22‏/09‏/2008

شعراء ظرفاء

من خلال عملي في مجال المطاعم وفي مدّة زمنيّة 22 عاماً،
ظهر في أسفل قدمي تكلّسات لحميّة،ما تعرف بِ " مسامير اللّحم" فقام أحد الأصدقاء بمساعدتي وهو صاحب محلاّت -إكسبرس-للأحذية الطبيّه ويدعى العم فؤاد شحوك (أبو الياس)، بترتيب إحضار حذاء طبّي دون أن يأخذ منّي مقابل .
فنظمت له هذه الأبيات الزجليّة:
خللّي عندك قلب يْحـِس**يَ الكلّك فكر وإحساس
عندَك بس الإكسبرس **بخدمه مليحه من بو الياس
***************
مـْسامير اللّحم كانت برجلي قصاص***وفتشت عا دكتور يعطيني الخلاص
ما لْـقيت إلاّ في محلّك يا اكسبرس***سبـّاط عندك أحسن من تخت برفـّاص

19‏/09‏/2008

اقوال الفن

بقوال الفن العالم جن *** والقلب حن عم الشــال
صوتي رن وبان السّن *** الغاره بشن بهالمجــــال
ـــــــــــــــــــــــــــــــــ
بقوال الفن العالم جَن *** والقلب حن من الكمان
صوتي َطن وبان السن *** ولما يرن انا فنـــــــــان
حرف العَن وحرف المِن*** بجرّو شحن مع خــــــزّان
طيور المَن بقلب القـــِن *** قمح طن الهــــم حـــــلال
ـــــــــــــــــــــــــــــــــــ
العالم شاف لف وطاف *** عرف عرّاف قبالو صفوف
شاف اشراف الهمِّ انظاف *** وعلأكتاف العنب قطــــوف
ألسعر ضاف ع الأصناف *** ريقه هاف على ملفوف
الظيف الاِنظاف وما بخاف *** وع الاشفاف الحلا سال
ــــــــــــــــــــــــــــــــ
العمل شاق وما بنطاق *** عرق الساق بقلب السوق
ذاق لفراق وراسو م راق *** عَ وضع عْراق العليه طوق
هاليوم تاق الولد العــا ق *** صحي وذاق بجسمو عروق
ما بنطاق الوضع ضاق *** ع الانشقاق مع العيـــــــال

العزومه


ستنيتك ع العزومة *** تا يحلا العيش
راحت عليك نومه *** وما عرفت ليش
ـــــــ
ع العزومه بستنّى *** ويحلالي الجو
من قعداتك بتهنّا *** ع انوار الضو
صوتك هالحلو غنّا *** زاحلّي السوّ
وانا البعطيك فنا *** تا مِنّي عيش
ـــــــ
ستنيتك عالعزومة *** وما عملت حساب
ما في عليّ لومة *** وما عندي جواب
كنت بوقتا مهمومه *** بحسب الاِسباب
فكاري بذهني مكتومة *** يالله معليش
ـــــــ
هالعزومة بلاكي *** يا أغلى حبيب
ما بتسوى وقاعد باكي *** حظ ونصيب
بهاي السهره لولاكي *** ما كان ترتيب
قدام هيبة حلاكي *** ما وقف جيش

البسمه


بسماتك حلوه شعلاني *** شو الها اعتبـــا ر
تا عبيها بقنانـــــــــي *** إلنا تـــذ كـــــــا ر
ــــــــــــــــــــــــــــــ
هالبسمه الحلوه فرجيني *** باوقات الضيــــــــق
سهام بقلبــــي ترمينـــي *** طّفـــــــي الحريـــق
وضحكتها عم تروينـــي *** وتبل الرّيـــــــــــــق
ولمّا إنت تلاقينـــــــــــي *** تشع الأنـــــــــــوار
ــــــــــــــــــــــــــــــــــ
مو عايز بسمه زيادي *** البسمــــــــات كثــار
أنا قــــــلبي ع اولادي *** وولادي زغـــــــــــار
حبـــي زادي وزوادي *** ربــــــة الـــــــــــدار
وعليها إعتمــــــــادي *** بأكبر قـــــــــــــرار
ــــــــــــــــــــــــــــــــــــ
بسمتنا زي الــــــدوا *** تشفي العلـــــيل
وعنها إحساسي روى *** وجاب الدليـــــــــل
ضحكك لقلبي كــــــــوى *** رماه قتيـــــــــــــل
ويا محلا ايام الهـــــوى *** كلهـــــا أسرا ر

18‏/09‏/2008

ألموفنبيك

في زياره إلى الأردن
جيتـــك من بعيـــــد يا موفنبيــــك
عا قــــد ما وصفـــولي الحـــلا فيــــك
بيوتك بتوحي لــــذاكَ الزيمــــــان
يالعطـــراز بيت جـــدِّي والبيــك
يا بحر المَيــِّت واطـــــــي المكـــــان
ضمـِّيت بحضانــك الفــنـــدق الشِّـــيك
من جوانح "نيبو" و"مجيب" و"قمران"
و"دانا"و"إيدوم"بيضلُّـــو حوالــيــك
و"راجيف"و"بيلاّ"مع "أوازس"و"لازان"
ألفيهــــم قامــــوا على صيــــاح الدّيـــك
و"أيالا""جرش"و"البيدا"و"الهسبان"
حيــُّو مسلـم ومسيــحــي والسِّـيـــك
"غرندال" "كابيتورياس"و"الفـَنــــان"
وكـــــــل سايح قــال للطـّاقـــم بهنـِّيـــك
"سْويما"و"تنّـور"و"عراق الاميران"
و"كهرانا"يقولوا للضِّـيــف بلاقـــيـــك
لـِموَي جاريـــه عَ صخيــــر الصِّـــوان
شلال نهر النـّيــــل مــــا هـــوِّي هيــــك
والشطـِّ بنظافْتو مــــا في بْلُبنـــان
والشــَّجـــر الاخضـــر يـــبهر النــّــاظـــر
والأرد ني يقول نحنــا أهاليــــك
" أجنحة الفندق"

تكريم الشّاعر حسين مهنّا

ألقيَ هذا القصيد في بيت منير برباره في أبو سنان:

يا خيي يا بن برباره تهنّا
بهالقعده الكريمه في وطنّا
على بو سنان هالقريه الوديعه
جمعت حسين ومحمد وحنّا
يا ليل الأنس في جو الطبيعه
سحرت عقولنا بشعر المغنّى
وراسي رْفعِت بشموخ البقيعه
بتحيّة حب يا حسين المُهَنّا
ع بيت الشّعر وحجارُه المنيعه
ياما رياح صدّيتو وأسنّه
تا صرتو نار وبْراس الطليعه
رفضتوا الذّل والخصم الطعنّا
يا أصحاب المقامات الرفيعه
يا أهل التربيه وأهل الثقافه
العزومه القادمه الدّعوه لَعِنّا

هوّارة العريس

عالهوّاره غنّي شعار***بهـاللّيلـه الشلبيِّـه
رجال الحيْ وأهل الدّار***إنتم يا نور عـْنَيي
شْبيب بحدّو ختيـار ***إلهـم أجمل غِنيّي
لِضيوف وكل الحُضـّار***بهالحفلة العربيـِّه
قعدنا سـْوِيِّه نسهر***بهاي ِ السهره الليليـِّه
إجا العريس تـْصوَّر***والصّوره تذكاريـِّه
والشَّعب حدّو اتجمهر***صار عندو أكثريِّه
بالسّاحه راح تْمَختر***زي رئيس البلديـِّه
حيثو عمّاره عمّر*** بنايه طرازا عصريّه
ما تلاقي متاو أشطر***بأمورو العـائليِّـه
بيربح هوِّ ما بيخسر***بـإداره مهـنيـِّه
عَ الجّيزه بحبش فكّر***وزبَّط 100بالميِّـه
ولَعفش بيتو حضّر***بْعـِدّي كهـربائيِّه
ولتخت مِجْوِزْ دبـَّر***بصناعه يدويـِّه
وخزاين مطبخ نجـَّر***بقشرة خشب أصليِّه
وتلفاز ملوَّن لستار***والبوصه يابانيـِّه
وتلاّجه كبيره وعَصّار***ومنتوجات محليِّه
وجلاّيه تنظف لغبار***وغسّـاله ألمانيِّـه
وميكرو يسخّن للزغار***أكلم عند العشيـِّه
وفرن للبطاطا قمار***جاج وكفته شرقيِّـه
بمالو عمرو مَ تبهوَر***كرمال الحلوه الشلبيِّه
ووَفّر دولار عا دولار***تا صار عندو إداره

إبن الجليل


زجلــنا زيّ القـــنــديل* وقايلْ حيْ بكلامــــو
وعندك هونا ابن الجليل* يعطي أجمل أنغامــــو
ــــــــــــــــــــــــــــ
عَ الرفوف وضعت حروف* كلمة أوف تشرّفنـــــا
جينا ألوف هونــــا نشوف* نشد كفوف مْعارفنــــا
بدق دفــوف بالــبطـوف* ما يكون خوف بظرفنا
بعمل معروف وبهدي سيوف* وكنزة صوف لعمامو
ــــــــــــــــــــــ
لمّا عْرِقت الشعرِنطقت* برقت مْرَقت عريقين
بالفَن عْلقت وأنا علَّقتْ* صور رجالٍ مذوقين
ويوم فرقت حبابي طرقت* عا أبواب السوقيين
شلت المقت بأبشع وقت* وما يوم ذقت أيّامو
ـــــــــــــــــــــــــ
أللحن فن ومـــا في لـن* قولي رن بهالألحان
ضحك السِّن وفكري حن* سقيت البن للخلاّن
شفت هن وصوتي عن* قلبي كن وشو طربان
ألغلا يشن دولار وين *والكل يظن بكلامــــو

17‏/09‏/2008

فارس العرب

لَشَخْصك يا فارسنا احْتِرامي*فــؤادي منزلك بارقى إقامي
وعَلى فْراقك عيوني تضل تدمع*من هـاليوم ليوم الـقـيامي
والأحْزان عمّت بكل موقع*رايــات سـودا كانت الأعـلامِ
يا فلسطيني الفي شعرو أبدع*بمواقف بطوليّه واسـتقـامي
حروفَك يا مَلِكْ عَ الشَّعب تسطع*تشفي للبشر كل جرح دامي
وتاجك بالشعر ما حد ينزع*حتّى لَـوْ ذابت كـلّ الـعـظامي
ومرارات العيش رح ضل أجرع*تَ يجف دمعي ويخرسني كلامي
وتحيـّاتي لمحـمود أرفَـع*ملاكي يوصِّـل حروفي بسلامي
لأنّو بالقلب محتل موضع*بقصايد شاعت في كل حـاره
وروت شعبنا ياللّي كان ظامي

16‏/09‏/2008

تحيّة للشاعر علم الدّين بدريّة

عَ الكرمل العالي التقينا بمين**اعرفوا يا ناس يا محترمين
اجتمعنا بشخِص شامخ محترم**بشموخ طود أقوى من العرين
التقينا بشاعر بيحب القلم**وافــكــارو زي ميّات المعـين
والنّور عا وجـّو بان ارتسم**كإني عرفتو من شِ عشر سنين
كم قصيدي وكم مقطوعه نظم**وتعقيب رايو عاطي المحبّين
هيدا حبيبنا المبدع علم**فخـــر أهل الدّاليه والعرب
من مرّاكـش تا توصل فلسطين

طفل زغير

ربّـيت إبني من صغر سِــنّو * السيهرني على اصوات عَــنّو
ومسكتو في إيدو طفل زغير* يومنّو حبى وتا نبت سِــنّو
وصرت عم ليعبو بقلب السرير * متل ديك وسكن جوّات قنو
ومشّيتو على الدّرب اليسير * ومن حركاتو عقلاتي جـَنّو
بلعب وشقلبه ضرب وتكسير * طَيلع مواهبو مـع كل فنّــو
قالوا هذا لا قاضي ولا وزير * هذا ولـــد مفــي ألذ مــنّو
نْ شالله بكره شوفــك كبيــر * وبعرسك يفرحولك ويغنّــــو
وصايتي أرضك لا تهجرا وتطير * وتبقى سند قدّامي بحياتــي
وقلبك مع ضميرك لنا يحنّو

زيارة إلى عكا

جيناكم عزومي عَ السـّرايا **من ربوع المداين والقرايا
ما سمعنا إنس من حكيو تشكـّا** وأطرو عليكو من كل البرايا
ونزلنا البحر في أرضك يَ عكـّا **وذكرنا الـَهم وجروح القضايا
والبونابرت لسوارا وِدَكـّا** حاول دُخولا من كل الزّوايا
وشهامتكو متل أهل مكـّه** وبعدتو عنكم شر الخطايا
لغزك يَ عكـّا ما إنسان فَكـّا** حيّر البشر في صمودك
والشــّاهد سورك بقي من البقايا

تحيّة للشاعر اللبناني عقاب بحمد

عقاب الزّين بالأشعار باشق** للورقستان هالزّجال عاشق
وعلمواقع بالأزجال قضّى** تَ حلاّ الجو وصار الجو لابق
وساحات الزّجل للخلان فضّى** وعا كل باب بن اسماعيل مارق
وسيوف الشعر عَ الحاسوب مضّى** ونظم القوافي للحلوين لايق
بطرف العين عَ النظرات غضـّى** يحافظ عا كيانو دون نزوه
تا يضل زي الشمس عَ الاِحباب شارق

حوادث

قاعد عَ نشرة خَبَر عم بسمع الأخبار**** وقليبي ياما صبَر ع اصوات حزناني
وشعبنا تعلّموا العبر من اللي صار*** تا ابتدا يخط الحبر كلمات عطشاني
والناس عم تهدس فِكــَروخلطت الأفكار*** لا بنات إلها نظر ولا شَباب سمعاني
مسكين بليالي سمر من سَيـّارتو طار*** معتلي لَجيب "الهمر" خيّال زيماني
والجيب نصِّين انشطر ويلع لهب نار*** وفؤادي من الحزن اعتصر صفّيت حيراني
شوفولي الخطريا ناس، من دمّو هالفوّار*** والضجّه عم تِعلا من دسك الإسطواني
ما يفهموا ع اللي انذكروالدارفي هالدّار*** والنّغم بالمختصر مالو أوّل و ثـــاني
والطرق مليانه وعَر بتهدم المشوار*** ودروب الــسَّفــرصارت مَفيها آماني
ولا نسمع أيــّا نفر واسلوبو هالغدّار*** وتسرع بيوم المطر وتصيرخسـراني
ولا تسـوقواساعة سَكِر إسمعوا يا كبار*** حتّى ما تلاقي المنتظر وتصير ندماني
وهوامش مرصوفه حجر تا يمشوا لِصغار*** والشّارع لقايد ظَهر باسلوب فزعاني
ولا تقول هذا القَدَر ومقسَّمه الأعمار*** واجبنا نتوخّى الحذر من فعل شيطاني
يا رب يا مَن غفر إحفظ لنا الأخيار*** تا يرجع لنا الأنسان سالم عا ديــارو
وتا صَلّي بليلة قمر من أجل إخواني

حكاية إنسان

طلع من الخليقه في البدايـي*** مِنِ مستوصَف من إيدين دايي
صرخ صرختو بأول بكي*** كْـأنك ضاربو ضربة عصايي
ومن آلامـــوابتدا يشتـكي*** بدّو يقول يا ماما كفـايـي
وابتدا يحبي من قبل الحكي*** ريكزتو وقــُلـْتِلو تعا جايي
كبروِزادت عندو فـذلـكي*** ومسؤوليِّـه مع أكبر درايـي
وأفكارو ما كانت ملـبَّـكي*** يفهم ع الإشاره في عنايـي
وعلىأوضاع ناسو مدركـي*** وشايفها قــدّامو مثل المرايـي
واختار عروسا بثوبا الليلكي*** واشترى بذله شاهرها دعايـي
ونظّم عيالو بدقــّه وتكتكي*** وربـّاهم وشو أبدع بالرّعايـي
وأعطى احترامو لبيّو ولكي***وأُمّو ما نسيها بفضل آيـي
نور بيتي في الّليالي الحالكي*** ربّيتي وِلْدي ع احلى تربايـي
يا دنيا إنتِ بْحرب ومعركـي*** بشقاوه من البدايي للنهـايـي
وكبر سـِنُّـو وعالعصا يتكي*** وحمل للوصايا والوصايـي
الدُّنــيا دولاب وينك يا ذكي*** تبرم بسرعه وتركض جرايـي
هْـديتك ابياتي هلمباركي***تَ تفهـمها ياالإ نـسـانِ حتـّى
وتشكر نعمتو، أفضل هـدايــي

الضمير

إلخـُبـِزْ يا ناس ما بينكـِرْخـَميرو***والطـّيور بـْلا جناحن ما يطيرو
وشو قيمة شعـِبْ من غير المبادي***زيِّ الزّهر ياللّي بـْلا عبيرو
بـِقوْلْ الزّور لا ترضي الأعادي***ودرب الصـِّدِقْ إمشي في مسيرو
ولإبن الخير إصرخلو ونادي***وباب الرّيـح إخرس زمـهــريــرو
الحجاره وحــِدها تبقى بوادي***وكل إنسان مـرجوعـــو لأصلــو
ولا ينباع ذرّه من ضميرو

إلحرب

إلحرب نيران عَ قلوب البرايا*** مَ فـــيـــها خير وبــتجلب خطايا
ومفينا عاد ندفع هالضريبي*** وسرايا بعـــدها تحارب ســـــرايـــا
بكيـْت كتير ما أصعب نحيبي***ما قـِــدْرَت تحملـــو جبــــال وودايا
فـــقدنا اخوانـّا منهم قريـــبي*** أهـالي تــــشرّدوا وصفـّو عرايـــا
المدافع دوّت بقــــوّه رهـــيبي*** خافــو الأهــل تا هـِرْبو حفــــايا
حملنا هموم واللــّوعه الكئيـبي*** شو راحوا ارواح والماتو ضحــايا
عيون الإم عـــا إبــنا سكيــبي*** الما بدها يغيب عن أرض القرايــا
بدنا السـِّلِــم يبعد هالمصيــبي***يعيـشو النـّاس في خــيــر ومحبـــِّه
وعَ شرع الحق نمشي بالوصايـــــا

جان الزجل

زجل بو الياس كـلـّو من أساسو *** يهز الأرِض لو يخطي بمداســو
بقوافي الشـّعر عمرو ما تـْجـَرّد *** وبــطرب نـَغـَم لحبــابو وناسو
ومن الـزّغـلول بالوصلات قـلـّد *** أخذ إسمو تَ يعطي من حـْساسو
إبــن لـبـنان عَ نـْغامو تـنـَهـَّــد *** عرف لـَوَزْنو وشو قــدّر مــقاسـو
دماغي بالشـّعر الاِفكــار جدّد *** وما رِضي العـَقـِلْ رايي احتبــاسـو
أعطى بالحكم دربو وعـــبـّــد *** ومـــا وِقــِع أبـَدْ في إلـتـبـاســـو
وجــان القافيه شــخصي صفــّد *** حبـسـتو ابّيت مع جمعة جـنــاسو
وصاروا عبيــدي في أرِض معـبــد *** يجــيبوا السـّطِر وآخذ إقتبـاســو
والمارد طـِلـِع والقــول ردَّدْ *** شـبـّيك لـُبـّيـــك طنطنــلي جراســـو
تـْمـَنـّى طلوب خيي يا مـحـمـّد *** وغنـّي بـهـالزَّجـَل تَ الكل يـسمعو
المــو عاجبــو يــلقــلق بــــراسو

أبو الزلف

هيهات يا بو الزلف***عيني يا موليـّا
خلـّيكي حدّي اسمعي***قوافي شعريـّا
************
محلا ايـّام السفر***عا ضبط ميعادي
نذكر ليالي السمر***عَ الجبل والوادي
ما كان عنـّا ضـَجر***وغنـّيت إنشادي
حبيبي قـلبي هـجر***وخلاّني وحـديـّا
************
يا بـِنِت نورا شَمِس***تحممت بشعاعا
بدّي تحاكيني هـَمِس***وخليكي شجاعا
يصعب عليي اللّمس***إلــنـّاس إذاعا
لو قالوا وِجِّـك عِبـِس***ما تصدّق عينيـّا
************
حبيبي عليي لـَفا***في بسمتو الحلوه
كانت بساعة صفا***من فكري شال بلوه
وبعدك عنـّي جفا***وجسمي غـِلي غـَلـْوه
صار لازم قلّك كفى***عا هالظلم لـِيــّا

ألدّين

نــَهـج المـــال لازمــــلـــو إداره *** دقــّه وفـكــِر تدبيــر وشـطـاره
بــْجـَيـْب الغير ما راضي اتحـركـش*** وابعــــد دوم عن درب العزاره
الشخص المحـترم والما تـهـَمـَّش***عارف مسلـكـو وحـُسن اختيارا
والمنــدان من كـيـــسك مـبــربــــش*** بـِخـْلـِق ميت حـيلي من اعذارا
واذا ديـّنـِتْو مـــن مالــك اتــفــرفـش***دار ضهرو وما اعـطـاك اعـتـبارا
وأمـْهـَلـتو مـــن الأزمـــان طـنــَّـش*** ضـحـك بعـِـبــّو من كــثـر القذاره
وان طـالبتو في الدّيـنــات خــرْمــش***بقطع كل علاقه بـحـسب ظـَنـّــو
كل سـَلـَفْ تــَلـَفْ ومردودو خـســاره

ع الروزنا

ع الروزنا عَ الروزنا *** وانا بغنـّيلا
طابت سهرات الهنا ***ومحلا تعاليلا
***********
يا أمـّوره من يافه***خلـّي أمرك صريح
حـِكيو عنـّك سلافه***وقالوا فيكي المديح
حـِسـِّك كلّو رهافه***وكلامك شو مريح
يا محلا هالظرافه*** وهالقامه الطويله
***********
يا حلوه نصراويّه*** عطرك شو عمــّا يفوح
كلـِّك رقّه وحنـّيـّه***تشفي القلب المجروح
وقعده معك سهريــِّه***بتردّ عليي الروح
يالله معنا ســَويـّه ***تا نـِحــْيي هاللّيــله
***************
يا أميرة البطــّوف ***تعالي لــَعـِنـّا
محبوبك بـَدّو يــِشوف*** نغنوشه بتـتـْغـنــّا
نسمع عتابا والأوف***بـِساحة موطـنــّا
ونطرب عا دق الـِدفوف***بالرقصه الجميـله
************
ياللّي جايي من حيفا***وماشيه كرج الحجل
كيفي مجاور لـَكيفا ***عا ردّات الزجل
لمحت خـْيالاوطيفا*** وقلت فيها غزل
يا ريتني كنت ضيفا***ووقف عَ مـْقابيلا
*************
الدّلوعه بنت عكـّا ***بنظراتا جرحتني
لـربـّي رح أتشكـّى***من اللّي سحرتني
لوْ بوها صار يتبكـّى***ما راح تفلـّتني
بدّا تْميل وتتركـّا ***على إبن جـيلا

غزل الأسماء

سناء
عشت وشفت ما أحلى أيّام الهنا**قديش فيها كان لعب وولدنا
وحياتي يا بُنيّه إلك مرهنا**تا زيل العلى راسك من جهد وعنا
وشيل آخر حرف من إسمك سناء**وتبقي في قلبي كل أيّام السنه
***********************
صفاء
ما انمحى رسمك من خيالي ومَ اختفى**كل دقيقه إجا وعلى راسي لفى
رح شيل آخر حرف من إسمك صفاء**وإيّامنا مع بعض تا تبقى صفا
******************
نادين
أنا اللّي فـْتَحتلـِّك بالأشعار نادي **وبقدومك غرّد حمام الدّوح شـــادي
ورح شيل آخر حرف من إسمك نادين **وبكلمة بـْحبـِّك رح إصرخ ونادي
*********************
عطاف
حبّك عَ قلبي هاج بقـــوّه وسـطا**من بعــد ما اتخبـّى في الفكر ولطى
رح شيل آخر حرف من إسمك عطاف **وقلـّك هيدا الحب اللّي من ألله انعطا
*******************
أحلام
بعيني بَشوفك زي جبالنا واعلى**وزي الذّهـب ومن الذّهـب أغلى
رح شيل آخر حرف من إسمك أحلام **تا رب الكون ما يلاقي متلك أحـلى
*******************
سيرين
يا حلوي الـْسكنتي عندي بهالدّيري **وليفك أنا عَ الأرض وما في غـيري
رح شيل آخر حرف من إسمك سيرين **تا قلّك إمشي حدّي يا حلوي وسيري
*******************
إعتدال
شفتك عَ وجّ الصبح مع قطر النّدى**وكان أوّل غــرام من صوبك بدا
رح شيل آخر حرف من إسم اعتدال**تا ما يقولو محمد على قلبا اعتدى
*******************
جليله
غمزات عيونا ياللّي عطيوني الدّليل**وما في حواجز تردعهم ولا مستحيل
رح شيل آخر حرف منّك جليله**ونعيش مع بعضنا عا أرض الجليل
*********************
ليلى
شـِرْبت قـَهِوْتي ممزوجه بحْوايج وهيل**وكانت ليلة أُنـْسْ عا ضي القمر وسهيل
رح شيل آخر حرف مــن إسمك ليلى**تا نبقى سـَويـِّه يا ليلى بهـاللـّيل
******************
مرام
لا تصدقي كاذب علينا إفـترى**وسهرات اللّـيالي أنا رايح أنطرا
ورح شيل آخر حرف من إسمك مرام**تا ما يـــوازيكِ بْهــالدّنيا أيا مرا
********************
أماني
سحرني جمالِك والحلا فتـّان**وعرفت إنو بحلاكي مَفي إنسان
رح شيل آخر حرف من إسمك أماني**وِحواليْكي رح أشعر في حب وأمان
********************
غدير
على درب الحبِّ سيريلي واهتدي***وع نغمات الهوى ضللّي إنشدي
رح شيل آخر حرف من إسمك غدير***لحتّى تذكريني في يومي وغدي
***********************
بريهان
بكلماتك الحلوه الأمّوره داريها**وكل حـَرِفْ ياللي من حروفك شريها
رح شيل آخر حرف من إسم برهان***وقول إله الكون يحفظها الباريها

عتابا

صديق العُـمـُر عَ الوفى مُـعاهـِد**تعـلّمنا سوا في أعلى مـَعاهد
إلعـِلـِم إبني والجهل معا-هــِد**تا نـِرفع سوا باجيال الشـّباب
****************
إلأَكل الزّاكي منعـِرفوعلى الشـّم **وأبو الياس لأَهـل الجود عـَشــّم
يا ريت شي يوم أسافرعلى الشــّام **تقابل إخواني مع جمع الحباب
**************
قالوا عن ذكا بو الياس ومضه **خارق مثل حد السـّيف وامضا
وإبني بالـشّـعر لعطيه إمــضا**تا يرفعلي راسي ما بين العرب
****************
يَ مارق عندي حـد البيت مـَرّه **تمرق عليي لو بتكون مـَرّا
أبو الياس إن سقاك البن مــُرَّا**تلاقي قـَهــِوْتو من أطيب شراب
*******************
قالوا إلأُم بـَنـّا والأَب جـَنـّا**وتحت أقدام الأمـّهـات جـَنــَّه
ولا تقولو عن محمد وَجــُنـّا**من عقــلو فايـِض بيت العتاب
****************
إلدِّهن بالعتاقي والصـِّحه-فيه **فاهم أُمورو وقاعد والصــِّحا-فيه
وشو ما كــَتـَبو عنـّو بالصحافي **بيضل إسمو لامع زيِّ الذهب
****************
رح قابلـَك لو قطعت بحور ونهار**قبل ساعات الفجـِر وطلوع لــِنْهار
لو قلولي قبلَك من اللُّقى إنـْهــــار**مَ رايح ينسـّوني لَمـُلقى لـِحـبـاب
******************
ما يوم مـْـشيت درب السـَّوْ ولا فـُجري **وما قطعت الصلا عا صلاة فـَجـْري
يَ ماشي عَ الأيمان والبر فَ-جري **لحتّى تنول من عـِنِد ربّك ثواب
********************
أنا بقول لـَـنـِدّي بالشـِّعر تع- بان **لأَنــَّك مش صريح ودوم تعبان
ولا تلعبهــا علــيّي زي تـــعبان **الأَفعى آخرتا إربـــــــــــاً إرب
*********************
أنا عندي المعرفه دون أدنى شــَكّ **بجود التبغ المن أرضو وشــَكّ
وعندي بلحسابات مضمون شـــكّ **أكيد وما في غــــلط بـــلحساب
****************
اليجهل بو الياس عن دربو ونا-دِلْ **أنا زجّال وفي مطعـــــــم ونا دل
وصوتي يصدح زيِّ العنـــــادل **ومثل الغزالي بـــأرض العرب
******************
طريقة قصيــدي بعملها إصــّه **كاملــِه بتكون ما فيها ولا أصـّه
وبالطرنيب بو الياس وكـَشـَف أصـّــا**بشهـدولوا حواليه إنـّو غـَلــَبْ
******************
جـَدِّي بحساباتو عـَدْني وحـَصاني **وقللـّي إنت لابقلك حــِصاني
وبالزجل لعطيلك حَـصاني **ملك وتكون من ملوك العتاب
**************
يا سيوف الزجل عا منبري حـِدِّي **تا شعّــار المنبــر يعتلو حــَدِّي
ابيات العتابا بعد بو الياس حـِدِّي والبسي الوانك السـّودا فوق لــثياب
*************
ما حـَدْ يلمس بو الياس بـِطَرْفا**لأَنـّو عـِندو الطـّيبـِه بـِطــُرْفـَه
وْلـَوِنّو إجا عا زمانو طــَرَفــَه **بنُ العـَبد لشهدلو بالعتاب
****************
بيت الحــِدا يَ شاعـِرنا شعْ-بي **لأَنــّو أصالة لغة شعبي
وعتابا بالزّجل لــِها شــُعُبي **ومن الأبيات بدوِّن كــتاب

عتابا

ربِّ الكون هالفكره وحى-لـِك **تـِتـْمتـَّعي بنعمة اللّـيل الحـالِـك
وإن سـألوكِ يَ حـِلـْوِي كيف حالـِك؟**إنـدَهـيلي ونا بعطيهم جواب!!!!!!
********************
يا حـَمْ تمــّوز ما إنسان طاقه **لو حم بطرد حم بألــف طاقـه
بـس أنـا المالـك بطــاقــه **وعندي مقـياس لنـار الشـباب
*****************
حبيبي قبل ما سافرنا مرْ-هون **ومرارات الجفا ذوّاق مـُرْهـُن
ولعيون الحبايب أنا مرهون **من هاليوم حتّى يوم الحساب
*******************
راح الســّوق بإيدوســَلْ وِقــِعْ والسـّلْ-لـَم **لأَنــّو شـــاف صديقـــو من بعيـــد ســَلـّم
ولو قلنا وِقــِع وقـــعــه من على سـِــلَّــم **لصارو يقـــولو حكى عــنــّو وِكــــَذَب
*************
إلأنــسان مـن طيــنة آدم معــمــول **بـَحــِبـّو لو بشتــِغــِلْ بــَيــّاع معمول
وبسقط من عيني لـو ملاّك مع-مول وبـــملك شاحنـــه ملياني ذهــب

عتابا

دَمِعي نزِل عـَبـْرَه بعد عـَبـْرَه **وذَكَرْت حْباب بالأحلام عبــــرا
وْمِنِ الدّنيا أنا استـــنــتجت عـِبره **آخِرْةِ النّاس فيها للتراب
*****************
حياتي فهِمِت وِعْلَيّي شو مر هم **عِرِفت الناس في حِلْوُن وَمرهم
وأبـــــياتي أنا زيّ مــــرهم **بترتحلا وبتهــدي لِــــــعصاب

عتابا

خذ الزّجل رزقا وجـْني-بي **والجاهل لا تقربو وجنبــي
ولو غرّوك بمال عربي واجنبي **لا تفتح للجهالـــــه أي بــاب
**************
عن الصّدِقْ إطـّلع شو بنجـُم **الصّادق حظــّو مكتوب ع نجوم
وناس الكذب في دمــُّن وبـَنـْجـُمْ **إبرة كرامه تشفي من العذاب
******************
يا زاير صديقك في أرضو معا-ليق **اتهنّى بأكلك واستعــمل معالـــــق
لوْ حضـَرْ ع الأكل كفته ومعاليق **ما بكفي إلاّ بوجــــود الحبــــاب
***************
روحي طلعت ع اللّي سافر ومن- هـَج **وزعلت كتير من الثار ومن -هـــــاج
وانا بحمل في الحيـــــاة منهـــــــــاج **قــــلب صافي الما تحـَمَّلْ من عذاب
********************
يا رايح الكرمه خذ الزّاد مع -ســــل **لأنّو العنب بالكرمــــات معـــسـول
إلنغم ما بـــيـــزبط إلاّ مع -صول **يزبطلك فيها أوتـــــــــــــار الطرب
********************
عَ فعل الخير يا إنسان إجري **الثواب تنول عند الله أجرِ
وإذا ميـّات الانهار تجري **الخضارِ بأرضنا يغطـّي التراب
*******************
بحب الأكل يا الفيـّو مقالي **وبحب الجريدي كرمال المقالي
وغير الصدق بو الياس مـَقالِ **وسطـّر حروفو بموية ذهب
*************
ريحتك مـِسـِك يا غالي فلا- فـُل **قـَعـَدْ عا جنبي يتـْسـَمـّع فلا-فـَ
لْومن ديــّاتي طــعمــــيتو فلافـــل **أكله مَ تسجـّلت في أيــّا كـتــــاب
*******************
لقفتو بايدي يـومنــّو علـِق-مـَـــرْ**وقلتلــّو يا روحي ليه داير عَ لـقمار
مَ بـَدّي سمعتك توصل عـلـــقمــــار**الخساره توَصـْلـَك تحت التــــراب
******************
وفـّيت الميزان ومـَدري مين-قلْ **وشولي وشايه وما بقول مين - قال
ورح أجمعكم على أكلات مـِــنـقل **تا نــنــسى العداوه ونرجع حباب
****************
فعل السـَّوْ لخــلاّنــي مَ عامــِـل **الشربو قهوه من دَيــي بمعاميل
والعافيه للّي اشتغلو بمعـــامل **ومنعرق جبــيـنهم عملو ذهـب
**************
بساحة بيتي قعد عندي وبـِركان **فـعل خير لربعــــو وبـِرْ-كان
وإذا ناديتو هاج زي بركــــان **بقـوّه وعزيمه بلــبــّي الطلب
*******************
عليِّ إلفي يا حـبــَيــِّبْ وِبــَدِّرْ**بعد الصلا بالجامع وبالدّيــــر
أو عند العشا وعا ضيـّات لبدير**السـّمرعندا مع جمع الحباب
********************
سـْهام المحبّه يا حـبـَـيـِّب بنا-دِق **فينا تأمـّل ونظراتك بنا- دِق
وعليك الإعدا إن رفعوا بنادق **بصدورنا نتصدّى وما نـِهاب
******************
إجانا البرد ونزّلي مخاطي **وع الدّكتور يا عالم مَ-خاطي
وبإيــماني الفي ما كنت خاطي **يشفيني من مرضي والإكتئاب
*******************
محمد بالعتابا عمل برقه **وبشعار الزّجل بـَعلا وبرقى
ضوأفكاري البولـّدو برقا **تكون سراج لكل عاشق عتاب
****************
رجال التـُّقى بديواني لإَمــّـا**وعلى الخيرات هالأمـّه لئمـّـا
وبــنت لجاويد ابتطلع لأمـــّا**ونسلها سالك دروب الصواب
************
الحيِّه من جحرا أنا نـَسـِلها**وعلاما تتخبـّى؟ ونحنا نـِسلها
ولو كان معها اولادا ونسـلها**مَ رح تسكن تانيه جوّات لتراب
****************
مرقت بتسلل والهدف مش- غول **لقاك الحـَكـَم إنـســاني ومش -غول
وبالأفكار لــمـّـا كنت مشــغول **ضـيــّعت الخطــّه وانســيـت الحسـاب
**************
أنا إبني بـَعرَفو والياس مين وقلـْتـِلّو عَ الفشل والياس مينو
وراسو كللّـتو بتاج الياسمينو**ورد المـحبـِّه الزرعو للحباب
******************
نــطرتا حد بيـــتا العـــشـِّمالي **وشفـِت عَ شجرتا العـُش-مالي
وخوفي ياخذو هندي وعشـِّي-مالي **خبـّـيت زغالــيلا جوّات لعبـــاب
*******************
إجا ع الفـَحـِص نشف ريقو بلع-دم **لعب الورق سـَرَق أصـّو بلع-دام
قـَتل نـَفـِس والقاضي حكمو بلاعدام **تا يتعلّم غيرو ما يـــلعب العــــاب
********************
عِلاجي هالزّجل والشّعر طِب لي **لأنـّو في الأماسي دوم طاب لي
ودفـّي لُو اجتمع مع دق طبلي **لرنّ الصـوت واحلـوّ الطــرب

عتابا

قلبي عليكم حَنْ والدِّفْ-فيني**وعودي رح جبلكن والدَّف-فيني
ومحبتكم في فؤادي دَفيني**لـُوبعاد كنتم عا روحي قِراب
*************************
حبيبي ان زِعِلْ مِنّي ما لاكني**متل الذّهب في مُلْكو ملكني
وزعيم بحبّو قوي مش ملِك-نِيْ**ينهشوا من لحمو إربًا إرَبْ
*************************
بأشعاري أنا داخل وبي كار**تا أتحدّى العم يْفرّوا وبي كرّ
بُيوتي موزّنه بْخيطي وبيكار**ومثلا يوم ما تهندس عتاب
***********************
البيارق رفرفت والعلََم-طار***والسِّعِد إجا ع بلادي عَلِمْطار
ويا فرحي بحبيبي القابلتوع المَطار***لقيت الخير عوجوه الِحباب
*********************
وقفت بصلا وجهي عـا قِبِلْتـي **والنطره طالت وإنتـي يالْقبلتـي
طْبَعتا ع جبينك وكانـت قبلتـي **فيها الحراره أحمى من شمس آب
***************************

محلا الدَخل عا بيتـا وزارا***ولمح مريولها مشدشد وزارا
ولونّي كنت قاعد في وزاره***لآخـذ رايهـا بأيّـا طلـب
********************

على حبِّك يا حلوي ألبي-ساطي***ورح افرشلِك زهور العل-بِساطي
وعنِدْ لقيانا بنطالك إلبسي- طيْ***تا ينتِعِش فيكي قلـب الحبـاب
*********************

هلّيـت متـل البَدِرْوالـوِجْ-بـان***أبيض بلونو زي التَلِـجْ واجبـان
وعمرك، ما تكون خنوع وجبان***شجاع برايك توقف ع الصّـواب
**********************

ندهَتْني من بعيد وصوتا دوى-لي***وشفيت من مرضي وعا قلبي دوا-لي
قلتلها يا يُمّا اطبخيلي دوالي***لْحبيبة قلبي ما بَفْشِل طَلبْ
**********************

أبويي إجا عليـي مشى-هَـدْ***تَ يكون بين جمهوري مُشاهِدْ
وقَلّلـي زي طلاّتَـكْ مَ شاهِـدْ***برنّات صوتك ، وانغامك طرب
*******************
حسود الحسدني ربـّي وقال -بيه **سـِمـِعتو الْكانت بالعلالي قـَلْ-بيه
إجا عا راسو قـــلبي بعــد قــلبي **سامحتو ومحطيت البغضا بقلبي
خذو من زرعي اللّي بروحي بـَقـِلْ-بيه **خلقـــني الرّب الصممني بقالــِبي
وكسر القالب تا تفـتـفــت تراب
************************
لا تقرَب الرّزق إن كان من -شر**فضيحه ومتل الغسيل العـَمـِنــْشـَر
وعَ لسان النـّاسِ رح بتكون منشــار**طالــع ونازل بمـقــالت عـــذاب
******************
إزرقّ جسمو وقالولي مـَعا -رَض **وعَ أمر الربّ ما كــنت مُعـــارض
وبالأزجـــال رح أفــتــح مــعارض **تا تفــــرح لِها جــميـــع الــشـّبـاب
*******************
من واجبك إن مرّيت قف-لي **إلعتابا مسكـّره معها قـِفلي
تخمين للقصيد تنهيه بقفلي **قبل ما تقفـّل قوافي الكتاب
********************
إلثرثار بـِحكيو دوم خـَفــَّش **خفيف وزي الخبز بموي خف-فاش
وفي ناس عليكم بتظهر متل خفــّاش **بتنسى المودّه وما تعملـّك حِـساب
*********************
إلفــكر لازم يتمشّى مع الطـِّب **والعماره ما بتعمر إلاّ مع الطـّوب
وغير هالراي الأمر بيكون معطوب **ولازمــو درايي مـــن حكم وآداب
***********************
إلحياه مو حلوه يا نـٍسا بلاكن **السّو بـَيــِعْدو عن قلبك بلا-كن
وليلة سمر اُنـٍـسا عا بلاكــيــن **تنسى دنياتك وشو فيهـــا عذاب
*********************
بالــحكي رجـالاتنا ما في بعدهـُن **ونظرهم من ورا حدود البَعَدهـــن
والتحت العصي مش زي البـِعـِدْهـُن **تعال وجرّب اتــــعلـّم حســـاب
***********************
شعاري "لا يا حرِبْ" " ولا يَ -فتنه** "بــجلــوس الـمـــودِّه لا يــــفــوتني
ومع ميـّات الــدّش لايفـــتــــني **قــوّتلي ضهري واشــتــدّ العصب
*************************
حـبـيـبـة روحـي ال بـَعـِـدّا ولـيــفــي **زيّ الــشــجره عـَظـَمـِتـها ولي-فــَيْ
بـحـمـّام الــهـنا بـصـابــونا ولـيــفـي **بـدعيكـِـه منها رْجـِعـْت من الـشباب
************************

عتابا

يَ طيور طيري ومن قمحي نَقِوْدي**وعا قد حبّاتم ارزقني نُقودِ
ونتعلّم اسلوب القياده ونقودي**الشّعب يمشي عَ دروبو صواب

عتابا

صباح الخير كل ما النّور أشرق**وشكري الخاص للخبّاز بيش-رَقْ
وقلبي ع الأهِلْ حَنْ وشرَق**تا يشعُرْ دوم باحساس الاِحْباب

15‏/09‏/2008

شوق للغياب

شوق للغيّاب
كلمات الزّجال : محمد علي الصالح (أبو الياس)السبت 30/8/2008
أيـا مْهاجِر عَلى دْيار الغريـبي ** بدَّي تعود لَبلادي الحبيبـي
أهلك بالبلـد يالناطـرينك ** حتّى تكون عَ الأرض الكئيبي
غِبْت وطوّلت، راحو سنينك ** الوطن لازمو رجال وشبيبـه
من جَبْلِةْ زنودك يِصْلَبّْ طينك ** تبني بيوت وطرازا رهيـبي
يا جايي ع الوطن هيدا حينك ** تردّ الصّاع صاعين بعجيـبي
وراس الزّاويه تِصْبح بعينـك ** واشْهَد إنّو ما ضاعت غُرُبتك
رْجِعِتْ حامل عِلْمَكْ في الحقيـبـي

14‏/09‏/2008

عتابا


مع رفاق السّوْ شخصي مَ ساكن
وعَ أغلاطم أنا ياللّي مو ساكن
وفي ناس ساكته بتظنّا مساكين
زيّ الأفاعي من تحت التراب

صورة أصدقاء

صورة أصدقاء
من اليمين: نعيم عرايدي ، كاظم إبراهيم